მელატონინი თუ მაგნიუმი ძილისთვის: ექსპერტებმა განმარტეს, რომელი ჯობია
მელატონინის უპირატესობები ძილისთვის
„მელატონინი არის ჰორმონი, რომელიც ხელს უწყობს ჩაძინებას და ძილის შენარჩუნებას. მას ორგანიზმი ბუნებრივად გამოიმუშავებს“, — განმარტავს ძილის დარღვევების ცენტრის დირექტორი, კენეტ ლი.
Mayo Clinic-ის მონაცემებით, ტვინის მიერ მელატონინის გამოყოფა დაკავშირებულია დღე-ღამის მონაკვეთთან. მისი დონე იმატებს, როდესაც ბნელდება და იკლებს მზის ამოსვლისას. ის ეხმარება ცირკადული რიტმის რეგულირებას და ორგანიზმს აძლევს სიგნალს, რომ დასვენებისა და ძილისთვის მომზადების დროა.
მელატონინის გამომუშავება სტაბილურია მოზარდობის ასაკიდან დაახლოებით 40 წლამდე, რის შემდეგაც მისი დონე კლებას იწყებს. კენეტ ლის თქმით, მელატონინი განსაკუთრებით სასარგებლოა ძილის ციკლის მოსაწესრიგებლად ისეთ შემთხვევებში, როგორიცაა:
ცვლებში მუშაობით გამოწვეული დარღვევები;
ფრენის შემდგომი ადაპტაცია (Jet lag);
ცირკადული რიტმის დარღვევა, როდესაც ბიოლოგიური საათი არ ემთხვევა თქვენს განრიგს.
მაგნიუმის უპირატესობები ძილისთვის
მაგნიუმი მნიშვნელოვანი მინერალია, რომელიც ასობით პროცესში მონაწილეობს, მათ შორის ძილზე მოქმედ პროცესებშიც (განსაკუთრებით მაგნიუმის გლიცინატის მიღებისას).
„მაგნიუმი ხელს უწყობს ძილს კუნთების მოშვებით, ნერვული სისტემის აგზნებადობის შემცირებით, ნეიროტრანსმიტერების რეგულირებითა და შფოთვის დონის დაკლებით. ის ასევე მნიშვნელოვან როლს ასრულებს ორგანიზმის მიერ მელატონინის გამომუშავებაში“, - აღნიშნავს დიეტოლოგი სტეფანი კრაბტრი.
მაგნიუმის გავლენა ძილზე არ არის ისეთი პირდაპირი, როგორც მელატონინის, თუმცა ის ეხმარება ორგანიზმს მოდუნებასა და დასვენებისთვის მომზადებაში. ითვლება, რომ მაგნიუმი მოქმედებს გამა-ამინოერბოს მჟავას (GABA) რეგულაციაზე, რომელიც ანელებს ტვინის აქტივობას და ამშვიდებს მას.
შეჯამება: რა ავირჩიოთ?
მიუხედავად იმისა, რომ ორივე საშუალების ეფექტურობა ჯერ კიდევ კვლევის პროცესშია, ექიმთან კონსულტაციის შემდეგ შეგიძლიათ არჩევანი თქვენი სიმპტომების მიხედვით გააკეთოთ:
მელატონინი საუკეთესოა მათთვის, ვისაც უჭირს ჩაძინება, იცვლის სასაათო სარტყელს ან სურს ძილის რეჟიმის კორექტირება. თუმცა, ის ყოველთვის არ აუმჯობესებს ძილის სიღრმესა და ხარისხს.მაგნიუმი უფრო სასარგებლოა უძილობის ან მოუსვენარი ძილის დროს, რადგან ის ხელს უწყობს რელაქსაციას და ამცირებს ღამის დაძაბულობასა თუ შფოთვას.