რა ვჭამოთ ღვიძლის ჯანმრთელობისთვის: დიეტოლოგებმა 4 ბოსტნეული დაასახელეს
არტიშოკი
„არტიშოკი მდიდარია ცინარინითა და ქლოროგენის მჟავით, რომლებიც ხელს უწყობენ ნაღვლის გამომუშავებას და ეხმარებიან ღვიძლს ცხიმების უფრო ეფექტურად გადამუშავებაში“, — განმარტავს დიეტოლოგი ამანდა კროუ.
მან აღნიშნა, რომ კვლევებმა აჩვენა კავშირი არტიშოკის მოხმარებასა და ღვიძლის ფერმენტების მაჩვენებლების გაუმჯობესებას შორის, ასევე ღვიძლის ქსოვილების დაცვას ოქსიდაციური სტრესისგან.
ჭარხალი
„ჭარხალი შეიცავს ბეტალაინებსა და ბეტაინს — ანტიოქსიდანტურ ნაერთებს, რომლებიც ეხმარება ოქსიდაციური სტრესის შემცირებას და ხელს უწყობს ღვიძლში ცხიმების მეტაბოლიზმს“, — ამბობს კროუ.
ჯვაროსანი ბოსტნეული
„ჯვაროსანი ბოსტნეული, როგორიცაა ბროკოლი, ბრიუსელის კომბოსტო და ყვავილოვანი კომბოსტო, შეიცავს ნაერთებს, რომლებიც ხელს უწყობენ ღვიძლის დეტოქსიკაციის ფერმენტებს, რაც ეხმარება მას ნარჩენი ნივთიერებების უფრო ეფექტურად გამოდევნაში“, — აღნიშნავს დიეტოლოგი ტალია ფოლადორი კვლევაზე დაყრდნობით.
ზოგიერთი კვლევა ასევე ვარაუდობს, რომ ეს ბოსტნეული აუმჯობესებს ინსულინის მიმართ მგრძნობელობას. აღინიშნება, რომ ინსულინის მიმართ მგრძნობელობის დაქვეითებისას სისხლში შაქრის დონე შეიძლება გაიზარდოს, რაც დროთა განმავლობაში ზრდის ღვიძლის არაალკოჰოლური ცხიმოვანი დაავადების რისკს. 2023 წლის კვლევამ კი ჯვაროსანი ბოსტნეულის მაღალი მოხმარება ღვიძლის ქრონიკული დაავადებებით გამოწვეული სიკვდილიანობის დაბალ რისკს დაუკავშირა.
ფოთლოვანი მწვანილი
„ფოთლოვანი მწვანილი თქვენი ღვიძლის ყოველდღიური საკვებია. ის მდიდარია მძლავრი მცენარეული ნაერთებით, მათ შორის ლუტეინითა და კვერცეტინით, რომლებიც ეხმარება ანთების ჩაქრობას და იცავს ღვიძლის უჯრედებს დაზიანებისგან“, — ამბობს ბერჯესი. 2021 წლის კვლევამ დაადასტურა, რომ მწვანილის დიდი რაოდენობით მიღება ამცირებს ღვიძლის გაცხიმოვნების რისკს.
როგორ მივირთვათ ეს ბოსტნეული მაქსიმალური სარგებლისთვის?
ვინაიდან ბევრი ბოსტნეული შეიცავს ცხიმში ხსნად ვიტამინებს (A, E და K), მათი საკვებ ცხიმებთან კომბინირება ორგანიზმს მათ ათვისებაში ეხმარება.
„შეუხამეთ ბოსტნეული ჯანსაღ ცხიმებს, როგორიცაა ზეითუნის ზეთი, თხილეული ან თესლეული, რათა უკეთ აითვისოთ ვიტამინები და ანტიოქსიდანტები“, — გვირჩევს ფოლადორი.
რაც შეეხება ჯვაროსან ბოსტნეულს, მომზადების მსუბუქი მეთოდები სასარგებლო ნაერთების შენარჩუნებაში დაგეხმარებათ. „ორთქლზე ან მსუბუქად მომზადება აუმჯობესებს მონელებას და ამავდროულად ინარჩუნებს სასარგებლო ნივთიერებებს“, — ამბობს კროუ.