როგორ შევწვათ და მოვხარშოთ წაბლი ყველაზე გემრიელად – ფრანგული და კორეული რეცეპტები, რომლებიც უნდა იცოდეთ
ფრანგული ტრადიცია - შემწვარი წაბლი, რომელიც ყველას უყვარს
პირველად წაბლი შემწვარი სახით ძველ რომში მოამზადეს, მაგრამ სწორედ საფრანგეთმა აქცია იგი ეროვნულ კერძად და ქუჩის სიმბოლოდ. ოქტომბერში მთელი საფრანგეთი აღნიშნავს „წაბლის დღეს“ - დღესასწაულს, რომელიც გასტრონომიული კულტურის ნაწილია.
პარიზში შემწვარი წაბლი პირდაპირ ქუჩებში იყიდება, სადაც გამყიდველები დიდ ტაფებზე ყრიან კარამელიზებულ ნაყოფს და საოცარი სურნელი იფრქვევა მონმარტრიდან შანზ-ელიზემდე. წაბლის გემო განსაკუთრებით წააგავს ტკბილ კარტოფილს, ნაზი ტექსტურითა და ოდნავ თხილის არომატით.
როგორ მოვამზადოთ კლასიკური ფრანგული შემწვარი წაბლი
აირჩიეთ მხოლოდ საჭმელად ვარგისი წაბლი (არ აგერიოთ დეკორატიულთან – ცხენის წაბლთან არაა საჭმელად ვარგისი). წაბლის ზედაპირი დანით X-ის ფორმით გასერეთ, რომ არ გასკდეს.
დაალაგეთ წაბლები პერგამენტზე დაფარულ ტაფაზე.
გააცხელეთ ღუმელი 200°C-მდე და გამოაცხვეთ 15 წუთის განმავლობაში, სანამ ზედაპირი ოდნავ არ გაშავდება და შიგთავსი არ დარბილდება.
როცა ოდნავ შეგრილდება, მოაცალეთ ქერქი და მიირთვით ცხელად – შესაძლოა ცოტაოდენი მარილიც მოაყაროთ.
ფრანგები წაბლს ამატებენ სალათებში, რიზოტოში, კრევეტებთან და სატაცურთანაც კი - ნამდვილ ფიუჟენ გემოს ქმნიან.
კორეული რეცეპტი — მოხარშული წაბლი „ალბამ ჯორიმ“
კორეული სამზარეულო ტრადიციულად მდიდარია მცირე, მაგრამ დახვეწილი გვერდით კერძებით – პანჩანებით. სწორედ ერთ-ერთ ასეთ კერძს წარმოადგენს Albam Jorim, ანუ ტკბილ-პიკანტური მოხარშული წაბლი, რომელიც საოცრად უხდება თეთრ ბრინჯს.
ინგრედიენტები (4 პორცია):
- წაბლი – 500 გ (გაფცქვნილი)
- წყალი – 1.2
- ჯანჯაფილი – პატარა ნაჭერი (დაახლოებით 3 სმ)
- ყავისფერი შაქარი – 70 გ
- მარილი – ½ ჩ.კ.
- სიმინდის ან ბრინჯის სიროფი – 80 მლ
მომზადება:
წაბლი წინასწარ დაალბეთ წყალში 4 საათით - ეს აადვილებს ქერქის მოცილებას.
დაჭერით ჯანჯაფილი თხელ ნაჭრებად.
აადუღეთ წყალი და ჩაყარეთ წაბლი. მოხარშეთ 20 წუთი, სანამ დარბილდება.
დაუმატეთ შაქარი, მარილი და ჯანჯაფილი, შეამცირეთ ცეცხლი და ხარშეთ კიდევ 10 წუთი.
შემდეგ ამოიღეთ ჯანჯაფილი და დაამატეთ სიროფი.
მოურიეთ და ხარშეთ კიდევ 2 წუთი.
გადაიტანეთ თეფშზე და მიიტანეთ სუფრასთან როგორც გარნირი ან დამოუკიდებელი დესერტი.
ეს კორეული კერძი მოტკბოა, ოდნავ კარამელიზებული ტექსტურით და საოცრად არომატული. განსაკუთრებით გემრიელია ცივად, მეორე დღეს, როცა ყველა არომატი შეერევა.
🌰 წაბლის საოცარი თვისებები
გარდა გემოსა, წაბლი სავსეა მაგნიუმით, კალიუმით, რკინით და ვიტამინ C-ით, რაც მას უნიკალურ პროდუქტად აქცევს. ის აუმჯობესებს მეტაბოლიზმს, აძლიერებს იმუნიტეტს და იდეალურია ცივი სეზონისთვის.
წაბლისგან ამზადებენ ფქვილსაც, სუპებს, დესერტებს და მსოფლიოში ცნობილ ტკბილეულს – „Marons Glacés“, ანუ შაქარში გალღობილ კარამელიზებულ წაბლებს, რომლებიც ნამდვილ გურმანულ ფუფუნებად ითვლება.
თბილი შემოდგომის საღამოებზე, როცა ფანჯრიდან წვიმა ისმის, არაფერი აჯობებს ცხელი ჩაით და არომატული შემწვარი წაბლით სავსე თეფშს.
ფრანგული დახვეწილობა თუ კორეული სიტკბო — არჩევანი თქვენზეა. მთავარია, წაბლი მოიხარშოს ან შეიწვას გულით, როგორც ამას სხვადასხვა კულტურაში საუკუნეების განმავლობაში აკეთებდნენ.